DİGƏR XƏBƏRLƏR
MENYU
“26 avqust 2022-ci ildə Ermənistan tərəfindən Laçın şəhərini, Zabux və Sus kəndlərini boşaltdıqdan sonra bu ərazilər Azərbaycan Silahlı Qüvvələrinin nəzarətinə keçmişdir. Azərbaycan hökumətinin Laçın, Zabux və Sus ərazilərində apardığı işlərin nəticəsində məlum olmuşdur ki, Ermənistan tərəfi bu əraziləri tamamilə minalamışdır. Demək olar ki, bu ərazilər erməni silahlı qüvvələri tərəfindən tamamilə təhlükəli bir vəziyyətə çevrilmişdir”.
AZİNFORM.AZ xəbər verir ki, bu fikirləri Demokrat.az-a açıqlamasında Milli Məclisin deputatı Mahir Abbaszadə deyib.
Deputat qeyd edib ki, son 15 gün ərzində Laçın ərazisində mindən artıq minanın tapılması bir daha göstərir ki, Ermənistan tərəfindən bu minalar planlı şəkildə basdırılıb:
“Təbii ki, bütün bunlar Azərbaycan tərəfinə maksimum ziyan vurmaq, insanların həyatları, taleləri ilə bağlı təhlükələr yaratmaq məqsədilə həyata keçirilmişdir. Ən qəribəsi isə burasındadır ki, tapılan minalardan görünür ki, minalar 2021-ci ildə Ermənistan Respublikasında istehsal edilmiş və sülhməramlılar tərəfindən qorunan koridor vasitəsilə Azərbaycan ərazisinə gətirilmişdir. Biz yenə də əvvəlki qaydalara sadiq qalaraq görürük ki, beynəlxalq təşkilatlar, xüsusilə insan hüquq və azadlıqları ilə məşğul olan təşkilatlarbeynəlxalq hüquq qaydalarını pozan Ermənistan tərəfinə çox səssiz davranırlar. Bu minaların hər biri Azərbaycan dövləti, azərbaycanlılar üçün, bu əraziyə səfər edən insanlar üçün olduqca təhlükəlidir. Biz 2020-ci ildə Böyük Qələbə əldə etdikdən sonra, yəni Qarabağı və Şərqi Zəngəzuru işğaldan azad etdikdən sonra təxminən 200-ə yaxın vətəndaşımız məhz bu minaların qurbanına çevrilmişdir. Minaların qurbanı olan insanlar ya ağır xəsarətlər alaraq sağlamlıqlarını itirmiş, ya da həyatlarından olmuşdular. Bu nöqteyi-nəzərdən hesab edirəm ki, beynəlxalq təşkilatlar öz səssizliyini pozmalıdır. Bu hadisələri görməzdən gəlməli deyillər. Çünki burada söhbət insan talelərindən gedir. Ermənistan tərəfinin Azərbaycan ərazilərində dağıntılar, yanğınlar və digər törədtdiyi hadisələrlə bərabər mina basdırılması məsələlərinə göz yummulmamalıdır. Əksinə, beynəlxalq hüquq daxilində Ermənistanın bu vandal hərəkətlərinə görə cavab verməli və beynəlxalq təşkilatlar tərəfindən Ermənistanın bu davranışları qətiyyətlə qınanılmalıdır”.
AZİNFORM.AZ
