MENYU
Cebhe.info-nun “Türk Ulduzları” rubrikasının növbəti qonağı “Kurtlar Vadisi” serialının unudulmaz aktyorlarından Yaşar Karakulak oldu.
O, həmçinin “Deli Yürek”, “Arka Sokaklar”, “Şefkat Tepe”, “Kaçak”, “Payitaht Abdülhamid”, “Muhteşem Yüzyıl: Kösem” kimi yüksək reytinqli bir çox serialda da tamaşaçıların qarşısına çıxıb.
- Yaşar bəy, siz əslən azərbaycanlısınız?
- Ata-babalarım Axısxa türkləridir. Onlar Azərbaycan və Qırğızıstanda yaşayıblar. Mənim hazırda da Azərbaycan və Qırğızıstanda yaşayan qohumlarım var. Buna görə də özümü əslən azərbaycanlı olaraq görürəm. Ümumiyyətlə, bütün türk dövlətlərini bir bütün olaraq düşünmək lazımdır. Daha dəqiq desək, özümü türk yurdlarının Azərbaycan bölgəsindən hiss edirəm.
- Azərbaycana heç gəlmisiniz?
- Xeyr, çox istəsəm də, indiyə kimi Azərbaycana gəlmə fürsətim olmayıb. Hətta bundan 30 il əvvəl azərbaycanlı bir rejissor Ankaraya gəlmişdi, o da məni Azərbaycana çağıracağını demişdi. Lakin təəssüf ki, sonra vəfat etdi. Üstündən 30 il keçdiyinə görə adını dəqiq deyə bilmərəm. Qardaşlarım Azərbaycana gediblər, amma mənə nəsib olmayıb. Mən də getmək istəyirəm. İnşallah, bir gün gələrəm, Azərbaycanda film, serial və ya teatrda rol alaram.
- Son olaraq çəkildiyiniz "Gibi" serialındakı performansınız çox bəyənildi. Həm onunla, həm də digər yeni layihələrinizlə bağlı nələr demək istəyərsiniz?
- "Gibi" serialının böyük marağa səbəb olması məni çox sevindirdi. Xüsusilə, mənim oynadığım bölümün ən çox izlənmə səviyyəsinə çatması bu sənətə 40 ilimi boşuna vermədiyimi göstərdi. Bütün izləyənlərə də tək-tək təşəkkür edirəm. Yeni layihələrə gəldikdə isə oktyabr ayında "TRT1"də yayımlanacaq bir serialda rol ala bilərəm. Bundan başqa film layihəm də var. Amma indidən dəqiq məlumatlar verməyim bir az çətindir. Həmçinin, rejissor Çağan Irmağın çəkdiyi, “Netflix”də yayımlanacaq “Yaratılan” adlı filmdə rol alacağam. Amma qaydalara əsasən ətraflı məlumat verə bilmərəm. Ötən aylarda isə "Xəzinə" adlı bir filmdə oynadım.
- Siz "Kurtlar Vadisi"nin məşhur dönəmlərində oynamısınız. Sizin canlandırdığınız Yəhya rəis obrazı serialın unudulmazları arasında yer alır. Lakin o dönəmlərdə bir çox məşhur aktyor bəzi səbəblərə görə "Kurtlar Vadisi"ndən ayrıldı. Bununla bağlı etiraflara günümüzdə də tez-tez rast gəlirik. Bəs sizin serialdan ayrılmağınıza səbəb nə idi?
- Əslində məndə bir az fərqlidir. Şaşmaz qardaşları "Kurtlar Vadisi" layihəsini Osman Sınavdan aldıqdan sonra mən Osman bəyə dedim ki, əgər ayrılmağımızı istəyirsinizsə, ayrılarıq. O isə "Yox, elə bir şey etməyin" dedi. Mən də seriala davam etdim. Lakin maddi vəziyyətləri daha yaxşı olan aktyorların çoxu layihədə yer almaq istəmədilər və ayrıldılar. Mən isə ssenaridə yazılan yerə qədər, hətta daha uzun müddət serialda rol aldım. Yəni mənə 35 bölüm oynayacağım deyilmişdi, amma 43 bölüm oynadım. Mənim və Laz Ziya rolunu oynayan rəhmətlik İstemi Betilin hekayəsi bitdiyi üçün ayrıldıq.
- Sizcə, "Kurtlar Vadisi" nə üçün bu qədər uğurlu oldu?
- Osman Sınavın ssenariyə doğru şəkildə baxışı buna təsir etdi. Onun seçdiyi oyunçular Türkiyənin ən məşhurları və hətta dünya aktyorlar ilə rəqabət edə biləcək səviyyədə idilər. Mən hər zaman deyirdim ki, İstemi Betilin fürsəti olsaydı, "Hollivud"da Marlon Brandonun yerinə keçərdi. Çünki o qədər dəyərli bir aktyor idi. Həmçinin, Osman Sınav Tarık Ünlüoğlu kimi bir çox istedadlı insanları bir araya gətirə bilmişdi. Osman Sınavın getməsindən sonra isə bu səviyyədəki aktyorlarla çox çalışa bilmədilər. Ali Sürmeli kimi bəzi oyunçular yer aldı. Yəni sonra gələnlər ilk 97 bölümdə oynayan insanlar qədər yetərli ola bilmədilər. Məncə, serialın daha sonra zəifləməsinin də səbəbi bu oldu.
- "Kurtlar Vadisi"ndə canlandırdığınız Yəhya rəis obrazı ölmədi, həbs olundu. Ona görə də bəzi izləyicilər daha sonra çəkilən "Kurtlar Vadisi Pusu" serialına sizin də daxil olacağınızı düşünürdü, amma bu baş vermədi. Səbəb nə idi?
- Əslində belə bir təklifin gəlməsini gözləyirdim. Amma heç bir təklif gəlmədi və belə bir düşüncə olmadı. Yəqin ki, həmin obrazı yeni ssenaridə bir yerə uyğunlaşdıra bilmədilər. Ya da ki, sənətçilər arasında qruplaşma olduğunu deyə bilərik. Bəlkə də dost olan müəyyən sənətçilər bir-birlərini dəstəklədiklərinə görə mənim gəlməyimi istəmədilər. Yəni niyə olmadığına dair bir səbəb tapa bilmirəm.
- Eyni zamanda, "Kurtlar Vadisi"nin bir çox aktyorunun toplaşdığı "Eşkıya Dünyaya Hükümdar Olmaz" serialında da sizi görə bilmədik. Burada da bənzər nüansları qeyd edə bilərik?
- Bəli, az öncə bəhs etdiyim qruplaşmalar buna səbəb oldu. Yəqin ki, dost qruplaşmalarının hazırladıqları siyahıda mən yox idim. Çünki mən onların tanıqlarından biri deyildim. Bu, ondan qaynaqlanır.
- "Kurtlar Vadisi" layihəsi 13 il davam etməsinə baxmayaraq, finalsız bir şəkildə ekranlara vida etdi. Sizcə, bu şəkildə sonlanmasının səbəbləri nələrdir?
- Məncə, Türkiyənin içində yer aldığı vəziyyətə görə davam edə bilmədi. Həmçinin, ilk 80 bölümdəki kimi sənətçilərin də çəkilməməsi buna səbəb oldu. Üstəlik, Necati Şaşmaz və Raci Şaşmaz arasında da problem var idi. Raci Şaşmaz və Bahadır Özdenerin də layihədən ayrılması serialın zəifləməsinə səbəb ola bilər. Konkret olaraq, içəridə nələr olduğunu demək çətindir. Amma təxmin etdiklərim bunlardır.
- "Kurtlar Vadisi" ilə yanaşı, "Deli Yürek", "Arka Sokaklar", "Şefkat Tepe", "Kaçak", "Muhteşem Yüzyıl: Kösem", "Payitaht Abdülhamid" kimi yüksək reytinqli seriallarda rol almısınız. Daima uğurlu layihələrdə yer almağınızı nəyə borclusunuz?
- Bu, deyəsən, seçimlə bağlı məsələdir. Mən teatrdan gəlirəm. 1981-ci ildən Ankaranın ən məşhur teatrında oynayırdım. İlk filmim isə 1987-ci ildə Kemal Sunalın baş rolda olduğu "Dütdürü Dünya" idi. Ondan sonra isə "TRT"-nin çəkdiyi filmlərdə oynadım. 2000-ci ildə isə bir film üçün görüşməyə gəldiyim İstanbuldan birdə geri qayıtmadım. O dönəm İstanbula gəldiyimi eşidən hər kəs də mənə təkliflər verməyə başladı. Mən də çox əmək sərf edərək bu illərə gəldim. Həm də pis olan bir layihədə yer almaq istəmədim. Teatrdan gələn insanlar pul arxasınca qaçmırlar, onlar üçün əsas sənətdir. Maraqlıdır ki, heç uğursuz layihələrdən də mənə çox təklif gəlməyib. Düzdür, bir neçəsinə rastlamışdım, amma qəbul etmədim.
- Siz həm teatr, həm film, həm də serialda çox uğurlu bir karyeraya sahibsiniz. Sizcə, bunlardan ən çətini hansıdır?
- Əslində hamısı eyni çətinlikdədir. Teatrda bir tamaşaya hazırlanmağın 1-2 ay çəkə bilir. Həmin tamaşanı səhnədə oynamaq və turnelərə çıxmaq heç də asan deyil. Çox çətinlik çəkirsiniz. Filmdə də daha çox kamera arxasında olan komanda yorulur. Biz aktyorların isə çəkiliş saatlarının müddəti rolumuza əsasən dəyişir. Bu səbəblə film və serial da çox yorucudur. Hələ baş rol oynamaq üçün həftənin 5 günü fasiləsiz çalışmaq lazımdır.
- 1980-cı illərdən etibarən dublaj sənətçisisiniz. Çox sayda filmdə sizin səsinizi eşitdik. Səsinizin dublaja uyğun olduğu necə kəşf edildi?
- Əslində bu, kəşf məsələsi deyil. Kaş ki, kəşf etməklə bağlı olsa, kimlərsə kimləri kəşf etsə. Teatrın içində olduğunuz zaman özünə əlavə gəlir qazana biləcəyiniz digər işlər də diqqətinizi çəkir. Yəni aktyor olaraq başqa nə edə biləcəyinizi düşünürsünüz. Türkiyədə 1970-ci illərdən xarici filmlər səsləndirilir. Mən də Ankarada olarkən "TRT"-də dublaj olduğunu eşitdim, çağırdılar və işə başladım. Zamanla bu sahədəki əkkiklərimi də düzəltdim. Ümumiyyətlə, ömür sərf etdikdən sonra yetişirsiniz. İndi isə artıq tanışlar araya girərək, dublaj sənətçisi edirdlər. İzləyicilər şikayət etmədiyi üçün də onların çoxu dublaj edir, amma bizim kimi olmurlar. Mən dublaj edərkən səsimin filmdəki səsə oxşaması üçün çox çalışıram. Dublaj da çətindir. Çünki onu dəqiq edə bilmək üçün dili səlist danışmaq lazımdır. Sonra aktyorluğunuzun və diqqətinizin də yaxşı olması şərtdir.
- Çox zəngin bir karyeraya sahibsiniz, indiyə kimi çox sayda oyuncu ilə çalışmısınız. Bəs birlikdə rol aldığınız ən yaxşı aktyorlar kimlər idi?
- Məni yetişdirən, mənə ustalıq edən o qədər dəyərli aktyorlar var ki... Ən başda Erol Demirözün adını qeyd edə bilərəm. Həmçinin, Selçuk Uluergüven, Savaş Yurttaş, Şener Kökkaya, İstemi Betil və Rüştü Asyalı kimi isimləri də demək lazımdır. Onlar aktyor yetişdirməkdə çox uğurlu insanlar idi. Ona görə həmin insanlara rastlayan və onların arasında böyüyənlər şanslı aktyorlar olur. Yəni mən məşhur aktyorların adını çəkib məni yetişdirdiklərini deyə bilmərəm. Məni yetişdirən insanlar əslində indi tanıya biləcəyiniz insanlar deyil. Çünki onlar film və televiziya sahəsində çox çalışmayıblar.
- Son olaraq, Azərbaycandakı izləyicilərinizə nələr demək istəyərsiniz?
- Hamısına ürəkdən təşəkkür edirəm və hamısını çox sevirəm. Sağ olsunlar. Bizim genetikamıza yerləşmiş ortaq bir mədəniyyətimiz var və onu daim yaşatmaq üçün çalışsınlar.
AZİNFORM.AZ
