Azərbaycan animasiya filmi dünyanın ən məşhur festivalında iştirak edir
16-03-2023, 22:11

Azərbaycanın "Hədis" animasiya filmi Annecy Beynəlxalq Animasiya Filmləri Festivalının müsabiqəsinə daxil edilib.

AZİNFORM.AZ xəbər verir ki, bu barədə Azərbaycan Animasiya Assosiasiyasının sədri, ANİMAFİLM Beynəlxalq Animasiya Festivalının təsisçisi və direktoru Rəşid Ağamalıyev məlumat verib.

Rejissorun sözlərinə görə, bu festival bütün dünya ölkələrində istehsal olunmuş animasiya filmlərindən ən yaxşılarını nümayiş etdirən aparıcı animasiya festivalı kimi tanınır:

"Annecy müsabiqəsinə daxil edilmək Azərbaycan kino sənayesi üçün mühüm nailiyyətdir. Rejissoru Nəzrin Ağamalıyeva, prodüseri Rəşid Ağamalıyev olan "Hədis" simvolik olaraq qarğaların hökm sürdüyü ədalətsiz dünyada haqq-ədalət uğrunda mübarizə aparan gənc qız haqqındadır. "Hədis" qısametrajlı animasiya filmi 2022-ci il sentyabrın 21-də İranda etiraz aksiyaları zamanı təhlükəsizlik qüvvələri tərəfindən qətlə yetirilmiş 22 yaşlı Azərbaycan türkü Hədis Nəcəfiyə həsr edilib və bu ölkədə gender, etnik və mədəni ayrı-seçkiliklə mübarizə aparanlara ithaf olunub".

Qeyd edək ki, filmin ssenari müəllifləri İsmayıl İman və Nəzrin Ağamalıyeva, filmin məsləhətçisi Məsud Pənahi, aparıcı animatoru Andrea Szelesovádır. Filmin montajını Jorge Sánchez Calderón həyata keçirib. Filmə musiqini Ondřej Zavadil yazıb. Filmi Zöhrə Kərimi səsləndirib.

Filmin partiturasında Azərbaycanın məşhur musiqiçisi Sevda Ələkbərzadənin musiqisi səslənir. "ANİMAFİLM Studio" animasiya studiyasının istehsal etdiyi "Hədis" filmi "Şimali Kaliforniya Azərbaycan Mədəniyyəti Mərkəzi"nin maliyyə dəstəyilə çəkilib. Azərbaycan Animasiya Assosiasiyası və "Əkinçi" platforması filmə media dəstəyi verib.

Məlumat üçün bildirək ki, Azərbaycan bu müsabiqədə ikinci dəfədir ki, iştirak edir. Birinci dəfə 2021-ci ildə Durna Səvərovanın "Fainanın sirri" filmi festivalın müsabiqə proqramında yarışmışdı.





up