DİGƏR XƏBƏRLƏR
MENYU
Hər il Macarıstanın yaranmasının ildönümünün qeyd edildiyi 20 avqust tarixində bu dəfə paytaxt Budapeştdə atəşfəşanlıq keçirilməyib.
AZİNFORM.AZ xarici mediaya istinadən xəbər verir ki, buna ölkənin Metereologiya Xidmətinin həmin tarixdə yağış yağacağını və fırtına qopacağını proqnozlaşdırması səbəb olub. Məhz bu qeyri-dəqiq proqnoz səbəbilə ölkənin ən mühüm milli bayramında baş tutmalı olan atəşfəşanlıq 27 avqust tarixinə ertələnib.
Lakin qurumun proqnozu düz çıxmayıb və həmin tarixdə yağış yağmayıb. Bu səbəblə qurumun baş direktoru Kornelia Radiks və onun müavini Qyula Horvat bu gün işdən çıxarılıb.
Bu barədə məlumatı Sənaye və Texnologiya naziri Laszlo Palkovics ictimaiyyətə çatdırıb.
Meteorologiya Xidmətinin əməkdaşları isə məsələ ilə bağlı bəyanat yayımlayaraq bildiriblər ki, onlar proqnozu əllərindəki mövcud məlumatlara əsaslanaraq veriblər. Bütün məlumatlar böyük ehtimalla fırtına olacağına işarə edib. Onlar hesabatlarını bu ehtimal əsasında hazırladıqlarını bildirirək yanlış qiymətləndirməyə görə üzr istəyiblər.
"Elmi modelləşdirmə aparılıb, buna baxmayaraq, bizim açıqladığımız məlumat sadəcə proqnoz idi, atəşfəşanlığın ləğv edilməsi qərarını biz verməmişik", - deyə bəyanata əlavə edilib.
Meteorologiya Baş İdarəsinin rəhbər işçiləri də iki yüksək vəzifəli məmurun işdən çıxarılmasına etiraz ediblər. Şöbə rəhbərləri 2006-cı ildə baş tutan atəşfəşanlıq zamanı qəfil başlayan və şounu izləyən 6 nəfərin ölümünə, onlarla insanın yaralanmasına səbəb olan tufanı xatırladıblar.
Həmin hadisədən sonra hər il milli bayramdan əvvəl Meteorologiyadan hesabat tələb olunduğunu vurğulayan idarə rəhbərləri builki şənliklər üçün də ən doğru proqnozu müəyyənləşdirməyə çalışdıqlarını, lakin bu cür proqnozlarda hər zaman yanılma payının olduğunu qeyd ediblər.
“Biz əlimizdə olan məlumatlardan ən yaxşı şəkildə istifadə etdik və vəzifəmizi yerinə yetirdik. İndi müstəqil qurumlar bu modelləri araşdırsınlar; bir səhvimiz olub-olmadığını öyrənək. İstintaq yekunlaşana qədər işdən çıxarılma qərarı ləğv edilməlidir”, - deyə qeyd edilib.
Xatırladaq ki, builki bayram tədbirlərinin daha yaddaqalan olacağı, Budapeştin indiyə qədərki ən möhtəşəm atəşfəşanlıq nümayişlərinə səhnə olacağı açıqlanmışdı.
Milli Məclisdə isə bu tədbirlərin baha başa gəlməsi məsələsi gündəmə gətirilmiş, hökumət bu məsələ ilə bağlı müxalifətin suallarını cavablandırmamışdı. İqtisadi böhranla əlaqədar olaraq müxalifət bu il nümayişlərə xərclənəcək pulların sosial layihələrə sərf olunmasını təklif edib, lakin bu, hökumət tərəfindən müsbət qarşılanmayıb. /bakupost.az/
