DİGƏR XƏBƏRLƏR
MENYU
İdman verilişlərində enerji içkilərinin reklam edilməsi yolverilməzdir. Alkoqol və siqaretin efirdə reklamı qadağan olduğu kimi enerji içkisi verilişə sponsorluq edə bilməz.
AZİNFORM.AZ xəbər verir ki, bunu Azərbaycan Qida Təhlükəsizliyi Agentliyinin (AQTA) sədri Qoşqar Təhməzli “Qida təhlükəsizliyi haqqında” qanunun icrası ilə bağlı bu ilin 6 ayında görülən tədbirlərə dair keçirilən mətbuat konfransında deyib.
"Bununla insan sağlamlığı üçün təhlükəli olan məhsulun təbliğinə şərait yaratmış oluruq. Bəzən diyetoloqlar da insanlara yalnış və qeyri-sağlam pəhriz növləri təqdim edir. Sağlam qidalanmanın təşviqi ilə bağlı xüsusi layihəmiz olacaq. Əhaliyə sağlam qidalanmanın necə olması təqdim ediləcək. Müşahidə etdiklərimiz odur ki, əhalinin, xüsusilə də böyüməkdə olan gənc nəsil sağlam olmayan qidalara daha çox üstünlük verir", - o, bildirib.
Bundan başqa, AQTA sədri Qoşqar Təməzli bildirib ki, ictimai iaşə obyektlərinin hotellərdə olduğu kimi beş ulduz sistemi üzrə təsnifatlaşdırılması aparılacaq.
Onun sözlərinə görə, bu proses Azərbaycan Qida Təhlükəsizliyi İnstitutu tərəfindən sahibkarların könüllü müraciətinə əsasən həyata keçiriləcək.
AQTA sədri bununla bağlı beynəlxalq təcrübəyə uyğun təlimatın da hazırlanaraq təsdiq edildiyini nəzərə çatdırıb. /report/
