DİGƏR XƏBƏRLƏR
MENYU
AZİNFORM.AZ kulis.az-a istinadən ssenarist, rejissor, 38 yaşında vəfat edən Şahin Zəkizadə haqqında maraqlı faktları təqdim edir.
Şahin Həsən oğlu Zəkizadə 5 mart 1978-ci ildə Bakı şəhərində ziyalı ailəsində dünyaya gəlib. Atası Həsən Zəkizadə görkəmli aktyor və rejissor Əlisəttar Məlikovun nəvəsi idi. Həsən Zəkizadə uzun müddət müəllim və məktəb direktoru kimi işləyib. Şahin məktəbi bitirəndən sonra Mədəniyyət və İncəsənət Universitetində təhsil alır. Müəllimi Tariyel Vəliyev olub.
Daha sonra təhsilini Moskvada kino üzrə davam etdirən Şahin rejissor fəaliyyətinə reklam və klip sahəsindən başlayır. Röya və Samir Cavadzadənin "Deyin ona", Elariz Məmmədoğlunun "Doroqa", Faiq Ağayevin "Sən elə bilirdin", tamamilə animasiyadan ibarət "Biləydin kaş", Tünzalə Ağayevanın "Gülbahar" mahnısı, Sevda Ələkbərzadənin "Salam Allahım" kliplərini çəkir.
Rejissor Lider TV və Yurd TV televiziyalarında çalışıb. Həyatı boyu sosial reklam, siyasi çarx, həmçinin sənədli filmlər çəkən Şahin 2003-cü ildə "Dünənə ehtiramla, sabaha ümidlə" və Əminə Dilbazidən bəhs edən "Tənha bülbülün rəqsi" sənədli filmləri ilə film sektoruna girib. 2015-ci ildə rejissoru və ssenari müəllifi olduğu "100 Kağız" filmi ekranlara çıxır.
Şahin Zəkizadə 3 dəfə ailə qurub. İkinci evliliyindən 2009-cu il təvəllüdlü Fatimə adlı qızı var. Üçüncü dəfə modelyer Səbinə Allahverdiyeva ilə evlənən Şahinin 2015-ci il Seyyid Əli adlı oğlu doğulur. Həyat yoldaşının sözlərin görə o Şahinin məktəb illərindən pərəstişkarı olub.
Ömür baxımdan bəxti gətirməsə də, karyera baxımdan yetərincə məşhurluq qazana bilmişdi. Onun sektorunda tanınmaq, populyarlıq qazanmaq çox da rahat deyildi. Daim kamera qarşısında qalaraq adını kamera önünə çıxarmaq çox çətin məsələydi. Şahinsə bunu bacarmışdı.
Şahin ölümündən 7 il qabaq sanki o qara xəbəri bilirdi və 2014-cü ildə yazdığı "Ölsəm, bağışla məni" şeirində elə bu barədə deyirdi:
Ölsəm, bağışla məni, Yalansız səni sevəni. Xatırlayıb ötüb-keçəni, Sevdiyim, ölsəm, bağışla məni
Hamıdan uzaq olmaq istədim, Xoşbəxt yaşamaq oldu diləyim. Odur ki, aynada tapanda əksini, Gözəlim, ölsəm, bağışla məni.
Şahinin ən böyük arzusu ilk dərs günü qızını məktəbə aparmaq idi. Təəssüf ki, həmin gün - 2017-ci ilin 15 sentyabrı gələndə özüylə bərabər Şahin üçün ağır bir sürpriz, bəla da gətirdi. Artıq avqust ayında Şahinə xərçəng diaqnozu qoyuldu. Səbinə Allahverdiyeva deyir ki, həkim ilk dəfə Şahinin xərçəng olduğunu birbaşa üzünə deyib.
***
Ölümündən 4 il sonra aktrisa Pərvin Abıyeva efirə çıxaraq Şahinlə olan münasibətlərindən danışıb. Etik olmayan bu açıqlamalar həm cəmiyyət, həm də Şahinin ailəsi tərəfindən birmənalı qarşılanmadı. Pərvin deyirdi ki, Şahin Zəkizadə onu sevirmiş:
"Son nəfəsinə qədər ona baş çəkirdim. Evləndiyi günə qədər məni sevirdi. Gənc idim, karyera hədəfim vardı. Bizim evliliyimiz alınmadı. Birgə proyektimiz də vardı. Mənə qarşı hisslərini biləndə, uzaqlaşdım. İnanclı, imanlı insan idi. Xasiyyətimiz uyğun gəlmirdi. Məni hər cür qəbul edirdi. Həyat yoldaşı ilə onları mən tanış etmişdim. Evliliklərinə mən vəsilə oldum. Mənə çox böyük sevgisi vardı. "Ölsəm, bağışla" şeirini mənə həsr etmişdi".
Həyat yoldaşı Səbinə Allahverdiyevanın da bu məsələyə cavabı çox gözlətmədi. Səbinə deyirdi:
"İlk əvvəl onu demək istəyirəm ki, ölmüş insanın arxasınca danışmaq, onunla gündəmə gəlmək nə dərəcədə düzgündür? Şahinlə neçə il evli olmuşuq. Pərvin həm Şahinin dostu, həm də mənim rəfiqəm olub. Ölmüş insanla reklam etmək düzgün deyil. Bu adam subay olmayıb ki, arxasınca bu cür danışır. Şahin sevdiyi insanla ailə həyatı qurdu. Çox söz deyərdim, amma lazım bilmirəm. Pərvinin sözündən belə çıxır ki, Şahin onu sevib, məni alıb. Elə şey olar? Həmin şeir heç vaxt ona xitab edilməyib. Biz Şahinlə həm yaxşı, həm pis gündə bir yerdə olduq" reaksiyasını verib. Şahin 2017-ci ildə dünyasını dəyişdi. Niyə durub 4 il sonra açıqlama verir? Onun sözündən belə çıxır ki, bütün kişilər bunun üçün ölür, amma o, heç kimi sevmir. Şahin xəstəxanaya düşəndə bircə dəfə Kənan M.M-lə gəldilər. Bir də dünyasını dəyişəndə, başqa gəlməyib".
Səbinə xanım Şahinin qanına daraşan xərçəngin ilkin əlamətlərindən danışanda qeyd edir ki, Şahin halsızlaşmışdı. Hərarəti olurdu. Bir gün gördüm ki, ağzından qəribə qoxu gəlir, dedim bəlkə hansısa dişi çürüyüb. O, ağzını açanda gördüm, damaqları elə haldadır ki, bu diş problem deyil, 10 gündən sonra - Əlinin doğum gününün ardınca artıq xəstəliyi kəskinləşdi, xəstəxanaya yerləşdirdik.
***
Şahin xəstəxanada olduğu müddətdə də boş durmur, bir yandan xərçənglə mübarizə aparır, digər tərəfdən daha bir bədii film ssenarisini yazır. Son günlərdə verdiyi müsahibələrinin birində qeyd etmişdi ki, ssenari hazırdı...
***
Şahinin xəstəliyi çox ağır idi, odu ki, xərçəng bəzi insanlarla hətta uzun illər yoldaşlıq etsə də, Şahinlə 6 ay döyüşdü. Hər gün ağrıları daha kəskinləşən rejissor şaxtalı gecələrin birində smetan və pendir istəyir. Yoldaşı onları alır və Şahin şirinçayla pendiri yeyir... Çox pozitiv görüntü olsa da, bu, Şahinin həyatda qalmaq üçün son cəhdi idi, ardınca yenidən kəskin başağrısı başlayır.
***
2017-ci il, fevralın 12-də Şahin dünyasını dəyişir. Son dəfə başını yoldaşının çiyninə qoyaraq ondan üzr istəyib deyir, bağışla, sənə əziyyət verdim...
***
Ölümündən beş ay sonra Şahinin atası Həsən Zəkizadə də dünyasını dəyişir.
