MENYU
Məlum olduğu kimi kofe özündə bir çox antioksidantlar birləşdirən bir içkidir. Kofenin bu güclü antioksidan xüsusiyyəti polifenol deyilən bir maddəni ehtiva etməsindən qaynaqlanır. Polifenol maddəsi olan içkilər sırasında kofe qırmızı şərabdan sonra ikinci yerdədir.
Qəhvənin kəşf edilməsinə keçilərin səbəb olduğunu bilirdinizmi? Rəvayətə görə, 9-cu əsrdə Efiopiyalı fermerlər qəhvə bitkisini yeyərkən keçilərinin rəqs etdiyini görüblər. Yerli bir rahib bunu sınamaq qərarına gəldi və içkinin gecələr onu oyaq saxladığını başa düşdü.
Dadından çox qoxusunu sevdiyim bu içki sağlamlığımız üçün ziyandırmı, yoxsa faydalıdırmı?
AZİNFORM.AZ bu gün bu haqda sizinlə bölüşmək istəyir.
Kofe növləri arasında süzülmüş (filtirli) qəhvənin ən sağlam variant olduğu müşahidə edilmişdir. Alimlər iddia edirlər ki, süzülmüş qəhvə xəstəlikləri və vaxtından əvvəl ölümü gecikdirir, hətta ömrü uzadır.
Qara qəhvə (türk kofesi və ya süzülmüş qəhvə, espresso) maddələr mübadiləsini sürətləndirir, yağ və şəkəri yandırır və kökəlməyə deyil, arıqlamağa kömək edir. Ancaq kofeni arıqlamaq üçün daim içmək düzgün deyil.
Tərkibi 2000-dən çox maddə ilə zəngin kofenin (söhbət südsüz, siropsuz və digər qarışıqlar olmayan kofedən gedir) faydaları:
Tərkibindəki kofein ürək-damar və sinir sistemini bir növ qıcıqlandırıcı təsir göstərərək onları oyandırır. Buna görə də kompüterlə işləyən və digər əqli işləri sürətlə görmək istəyən insanlar, xüsusilə də ofis şəraitində gərgin çalışanlar kofe ilə ayaqda qalmağa çalışırlar.
Tərkibində antioksidantlar olduğu üçün xərçəng riskini azaltdığı güman edilir.
Bəzi araşdırmalar göstərir ki, gündə 2-3 fincan kofe şəkər xəstəliyi yaranmasının qarşısını alır və buna səbəb kofein deyil, kofenin tərkibindəki digər maddələr səbəb ola bilər.
Çin alimlərinin araşdırması isə kofeinin iştahı azaltdığını və bədən çəkisini azaltmağa kömək etdiyini göstərir.
Araşdırmalar həmçinin, kofeinin beyində gedən yaşla əlaqədar olaraq neqativ dəyişikliklərin qarşısını aldığını və nəticədə Alzgeymer və Parkinson kimi xəstəliklərin qarşısını almasına kömək etdiyini göstərir.
Kofenin ziyanı
Uzun müddət istifadə etdikdə şəkər, narkotik kimi asılılıq yaradır və siz bir günü belə kofesiz keçirə bilmirsiniz.
Təzyiqi qaldırır və hipertoniyadan (yüksək arterial təzyiq) əziyyət çəkən insanlarda insult riskini yüksəldir.
Tərkibindəki kofestol maddəsi qanda xolesterini yüksəldir.
Yuxusuzluq yaradır.
Dişləri saraldır və dərinin rəngini boğur, nəticədə sağlam olmayan görünüş yaradır.
Bədəndə susuzluq yaradır.
Yaşlı insanlarda kalsiumun bədəndən çıxarılmasına və sümük kütləsinin itirilməsinə və nəticədə sınıqlarla səbəb ola bilir.
Hamilə qadınlar üçün faydalı bir içki sayılmır.
Qəhvə dünyada sudan sonra ikinci ən məşhur içki olsa da, bir çox insanlar bu ləzzətli içki haqqında çox şey bilmədən onu içirlər. Növbəti dəfə özünüzə bir fincan isti kofe tökəndə bir neçə dəqiqənizi ayıraraq qəhvənin mənşəyi və onun həyatınızla necə birləşə biləcəyini düşünün.
AZİNFORM.AZ
