DİGƏR XƏBƏRLƏR
MENYU
“Qasim həmişə uşaq vaxtlarında deyirmiş ki, “mən gələcəkdə hərbi xidmətə gedəndə şəhid olacağam”. Elə də oldu… Qasim ən ali zirvəyə - Şəhidlik mərtəbəsinə ucaldı”.
Bu sözləri “Qafqazinfo”ya Azərbaycan Ordusunun keçirdiyi lokal antiterror tədbirləri zamanı şəhid olan Qasim Məmmədhəsənovun yaxınları deyib.
Onların sözlərinə görə, 2001-ci ilin dekabrın 8-də Sabirabad rayonunun Qaraqaşlı kəndində sadə bir kəndli ailəsində anadan olan Qasim ali təhsilli, ailəsinə, evinə bağlı bir gənc olub: “O, ailənin böyük övladı idi. Özündən sonrakı qardaşına və bacısına həmişə mehriban yanaşır, onlara qayğı göstərirdi. Çox vətənpərvər gənc idi. Qasim 2023-cü ilin sentyabr ayında baş verən döyüşlərdə ehtiyatda xidmət edən əsgər idi. Lakin Qasimdə olan vətən sevgisi onu müharibənin ocağına- Xankəndi istiqamətində getməyə vadar etdi. O, ön cəbhədə vuruşmaq üçün könüllü olmuşdu. Bu səbəbdən 19-20 sentyabrda özünün şücaəti, döyüş əzmi ilə öndə getdi. Qasim ona həvalə edilmiş strateji mövqeyi düşmənin qəfil hücumlarından qorumaq və öz dostlarının həyatını xilas etmək üçün xüsusi qəhrəmanlıq göstərərək özünü təhlükəyə atıb və sentyabrın 20-də şəhadətə qovuşub. Ərazi bütövlüyümüzün bərpası üçün sevinib, 192 igidimiz üçün ağladığımız gün… Həmin gün şəhid olan 192 igidin arasında Qasim də var idi”.
