Qarabağa silah daşınması bu addımı qaçılmaz edir
7-11-2022, 10:31

Son iki ildə yaşananlar və ən son rus sülhməramlıların erməni separatçılarına Gümrüdən silah daşıması faktının üzə çıxması Azərbaycan Ordusunun və Gömrük Komitəsinin Laçın dəhlizində xidmətinin təşkil edilməsini labüd edir.

Bu sözləri AZİNFORM.AZ-a rus sülhməramlıların “sülhməramlı humanitar yardım” adı altında Laçın dəhlizi ilə Qarabağ separatçılarına silah-sursat daşıması faktı haqqında danışan Ankara Universitetinin professoru Toğrul İsmayıl deyib.

Professorun sözlərinə görə, Rusiyanın qarşısında konkret tələb qoyulmalıdır:

“Laçın dəhlizi yalnız mülki məqsədlər üçün istifadə olunmalıdır. Lakin Azərbaycan tərəfi orada yükü və minik avtomobillərini yoxladıqdan sonra onlar sərbəst hərəkət etməlidir. Bugünədək Rusiya ilə sülhməramlıların fəaliyyəti, vəzifə və öhdəlikləri ilə bağlı müqavilə imzalanmayıb. Fikrimcə, təcili şəkildə bu müqavilə imzalanmalı və həmin müqavilədə sülhməramlıların fəaliyyətinin çərçivəsi konkret göstərilməlidir. Yəni rus sülhməramlılar özbaşına hərəkət etməməlidir. Azərbaycan müstəqil dövlətdir, onun sərhədləri toxunulmazdır. Bunu son iki ildə öz vəzifəsini ancaq separatçı tör-töküntüləri himayə etməklə bitmiş hesab edən Rusiya və rus sülhməramlıların diqqətinə qəti və kəskin şəkildə çatdırmaq, onların qarşısında tələb qoymaq lazımdır. Yoxsa belə silah daşınmaları və rus sülhməramlıların özbaşınalığı, hüquq tanımaz hərəkətləri davam edəcək”.





up