Beynin SİRLƏRİ - İnsan ölümdən əvvəl ruhunun uçduğunu necə görür?
4-05-2023, 21:48

Klinik ölüm vəziyyətində xəstələr "tunellər" və ruhlarının "bədəndən kənarda uçduğunu" görürürlər. Bu görüntülər beynin şüurla oxşar olan xüsusi bir vəziyyətə keçməsi ilə izah olunur.

AZİNFORM.AZ xəbər verir ki, bu barədə Miçiqan Dövlət Universitetinin (MSU) mətbuat xidməti Cimo Borjiqinin rəhbərlik etdiyi amerikalı neyrofizioloqlara istinadən məlumat yayıb.

Alimlər infarkt səbəbiylə komaya düşən dörd xəstənin beyin fəaliyyətini izləyiblər. Həkimlər onların həyatını xilas edə bilməyiblər və yaxınları onları süni nəfəs aparatından ayırmağa razılaşıblar. Həkimlər ümidsiz xəstələrin başlarına elektroensefaloqrafiya sistemi qoşub və ölümdən əvvəl beyin fəaliyyətinin necə dəyişdiyini də izləyiblər.

"Müşahidələr göstərdi ki, xəstələrin ölümü onların beynində qamma aktivliyinin kəskin partlaması ilə müşayiət olunub və bu aktivlik beynin temporal, parietal və oksipital bölgələrinin şüurla birbaşa əlaqəli bölgələrində cəmləşib", - eksperimentin nəticələrində qeyd olunub.

Əvvəllər hesab olunurdu ki, belə anlarda beyində qlükoza və oksigen çatışmır, nəticədə onun fəaliyyəti azalmağa başlayır, xaotik impulslar yaranır və halüsinasiyalar yaranır. Ancaq indi alimlər bunun əksinin doğru olduğunu sübuta yetirib və bildiriblər ki, beyin şüurlu vəziyyətə bənzər heyrətamiz fəaliyyət göstərir. Alimlər izah ediblər ki, klinik ölüm anında eyni hadisələr beyin fəaliyyətində də baş verir. /publika.az/




up