DİGƏR XƏBƏRLƏR
MENYU
Bakı Ağır Cinayətlər Məhkəməsində paytaxtdakı “Location” gecə klubunda baş verən partlayışda təqsirləndirilən şəxslərin məhkəməsi başlayıb.
Hakim Faiq Qəniyevin sədrliyi ilə keçirilən prosesdə təqsirləndirilən şəxslərin anket məlumatları dəqiqləşdirilib.
Məhkəmədə məlum olub ki, təqsirləndirilən şəxslərdən biri - Fövqəladə Hallar Nazirliyinin Dövlət Yanğın Nəzarəti Xidmətinin 2-ci Ərazi Dövlət Yanğın Ərazi idarəsinin inspektoru Ruslan Məmmədov istintaq dövründə barəsində həbs qətimkan tədbiri dəyişdirilərək ev dustaqlığına buraxılıb.
Məhkəmədə çıxış edən dövlət ittihamçısı Ruslan Məmmədovun barəsindəki ev dustaqlığı qərarının həbs qəti imkan tədbiri ilə əvəzlənməsini istəyib.
Yanğın təhlükəsizliyi üzrə məsul şəxs Rəsul Rəsulovun vəkili Umud Abdurrəhmanlı bildirib ki, müdafiə etdiyi şəxsin əməlində cinayət tərkibi yoxdur. O qeyd edib ki, onun barəsində olan cinayət işinə bəraətverici əsaslarla xitam verilməlidir.
Ruslan Məmmədovun vəkili Vasif Allahverdiyev prokurorun müdafiə etdiyi şəxsin barəsində həbs qətimkan tədbirinin seçilməsi ilə bağlı çıxışına etiraz edib. Bildirib ki, onlar cinayət üzrə 40 zərərçıkmişlə rəsmi qaydada barışıq əldə ediblər, onlara dəymiş maddi ziyan ödənilib: "Ruslan Məmmədov az ağır cinayətlərdə ittiham edilir. Onun barəsində həbs qətimkan tədbirinin seçilməsi üçün əsaslar mövcud deyil".
Təqsirləndirilən Orxan Səfərlinin də vəkili çıxış edərək onun barəsində olan cinayət təqibinə xitam verilməsini istəyib. Qeyd edib ki, istintaq dövründə Orxan Səfərlinin barəsində olan cinayət işinə xitam verilməsi, onun həbsdən azad edilməsi barədə vəsatət versələr də, heç bir əsas gətrilmədən vəsatətlər təmin edilməyib.
Orxan Səfırlinin vəkili Muxtar Mustafayev qeyd edib ki, bu cinayət işi ibtidai istintaqa qaytarılmalıdır: "Bu işdə əsl günahkar olan şəxslərə ittiham verilməlidir. İttiham da daha ağır ittihamla əvəz olunmalıdır. İbtidai istintaq qanun pozuntusu ilə aparılıb".
Məhkəmədə dindirilən Elçin Rzayev deyib ki, prokurorluqda dindirilib, avtomobilinə ziyan dəyib. Qeyd edib ki, sonda zərərçəkmiş qismində tanınmayıb. O, cinayət işinin istintaqa qaytarılması, işdə onun zərərçəkmiş şəxs qismində tanınması barədə qərar qəbul edilməsini istəyib. Elçin Rzayev deyib ki, hadisə zamanı avtomobilini orada saxlayıb, ona 3500 manat ziyan dəyib.
Daha sonra hakimlər hazırlıq iclasının qərarını elan edib. Qərara görə, cinayət işi məhkəmə baxışına verilib.
Məhkəmə təqsirləndirilən şəxslərin vəkillərinin vəsatətlərini təmin etməyib. Ruslan Məmmədovun barəsində həbs qətimkan tədbirinin seçilməsi ilə bağlı prokurorun vəsatəti təmin edilməyib. Onun barəsində polisin nəzarəti altına verilmə qətimkan tədbiri qüvvədə saxlanılıb.
Elçin Rzayevin müraciəti ilə bağlı məhkəmə heç bir qərar qəbul etməyib. Buna səbəb kimi onunla bağlı işdə heç bir sənədin olmaması göstərilib. Onun diqqətinə çatdırılıb ki, bununla bağlı aidiyyəti üzrə qurumlara müraciət edə bilər.
Məhkəmə baxışı iyulun 25-nə təyin edilib.
Qeyd edək ki, bu il aprelin 3-də gecə saat 03 radələrində paytaxtın Səbail rayonu ərazisində yaşayış binasının 1-ci mərtəbəsində yerləşən “Location” gecə klubunda partlayış baş verməsi nəticəsində 1 nəfərin ölməsi, 37 şəxsin müxtəlif dərəcəli bədən xəsarətləri alması, 14 avtomobil, 1 mənzil və 2 qeyri-yaşayış obyektinə ziyan dəyməsi faktı əsasında Cinayət Məcəlləsinin müvafiq maddələri ilə başlanmış cinayət işinin istintaqı Baş Prokurorluğun İstintaq idarəsi tərəfindən aparılıb.
Toplanmış ilkin sübutlarla müəyyən edilib ki, qeyd olunan obyektin mətbəxində qanunsuz olaraq, eləcə də mövcud qaydaların tələbləri pozulmaqla propan qazının sıxılmış mayesi ilə dolu olan qaz balonundan istifadə edilib, həmin qaz balonunun partlaması binada dağıntılara və yanğına səbəb olub.
İstintaq zamanı yanğın təhlükəsizlik qaydalarının riayət edilməsinə məsul olan iaşə obyektini icarəyə götürmüş “Merser food” MMC-də administrator işləyən Rəsul Rəsulova Cinayət Məcəlləsinin 225.2-ci (yanğın təhlükəsizliyi qaydalarını pozma - ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), həmin MMC-nin təsisçisi-klubun meneceri Orxan Səfərova Cinayət Məcəlləsinin 314.2-ci (səhlənkarlıq-ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə ittiham elan edilib.
Eyni zamanda istintaq zamanı, qeyd olunan ərazi üzrə yanğın təhlükəsizliyinin təmin edilməsinə məsul olan - Fövqəladə Hallar Nazirliyinin Dövlət Yanğın Nəzarəti Xidmətinin 2-ci Ərazi Dövlət Yanğın Ərazi idarəsinin inspektoru Ruslan Məmmədov tərəfindən vəzifələrin icrası zamanı səhlənkarlığa yol verilməsi müəyyən edildiyindən, sonuncu Cinayət Məcəlləsinin 314.2-ci maddəsi ilə təqsirləndirilən şəxs qismində cəlb olunub.
Hər üç şəxs barəsində Binəqədi rayon məhkəməsinin müvafiq qərarları ilə həbs qətimkan tədbiri seçilib. /trend/
AZİNFORM.AZ
