DİGƏR XƏBƏRLƏR
MENYU
ABŞ prezidenti Co Bayden və şahzadə Məhəmməd bin Salman arasında “Camal Qaşıqçı” gərginliyi yarana bilər. İkisinin görüşündə Baydenin sözlərinə cavab verən şahzadə bin Salmanın ona İraqın işğalını xatırlatdığı bildirilib.
AZİNFORM.AZ xəbər verir ki, ABŞ prezidenti Co Baydenin Səudiyyə Ərəbistanına iki günlük səfəri və vəliəhd şahzadə Məhəmməd bin Salmanla görüşü zamanı Camal Qaşıqçının qətli ilə bağlı dəyərləndirmələrə Ər-Riyad administrasiyasından cavab gəlib.
2018-ci ildə Səudiyyə Ərəbistanının İstanbuldakı konsulluğunda səudiyyəli jurnalist Camal Qaşıqçının qətlindən sonra insan haqları ilə bağlı sərt sözləri tənqid etdiyi Səudiyyə Ərəbistanına səfər edən Baydenin bu addımı ölkəsində böyük reaksiyalara səbəb olub. Qətllə bağlı "hesabını soracağıq" açıqlamasından çox keçmədən Səudiyyə Ərəbistanına gedən Bayden dünən görüşdüyü Səudiyyə Ərəbistanı vəliəhdi Məhəmməd bin Salmana Qaşıqçı cinayətində birbaşa məsuliyyət daşıdığını düşündüyünü söyləyib. Bayden qeyd edib ki, Şahzadə bin Salman Qaşıqçının qətlinə görə şəxsən məsuliyyət daşımadığını iddia edib, lakin o, bu fikirdə israr edib.
Mövzu ilə bağlı Səudiyyə Ərəbistanı administrasiyasından açıqlama verilib. Britaniya xəbər agentliyi "Reuters"ə açıqlama verən Səudiyyə rəsmisi Şahzadə Salmanın Baydenə Qaşıqçının öldürülməsi kimi səhvlərin qarşısını almağa çalışdığını, lakin ABŞ-ın İraq kimi məsələlərdə də səhvlər etdiyini söyləyib.
Qeyd olunub ki, Şahzadə ABŞ-ı dolayısı ilə tənqid edərək, Baydenə "başqa ölkələrə müxtəlif dəyərlərin tətbiqinin əks nəticə verəcəyi" barədə xəbərdarlıq edib. Şahzadə bin Salmanın ABŞ-ın İraqdakı işğalını, bir müddətdir gündəmdə olan Əbu Qreyb həbsxanasını və ötən ay İsrailin açdığı atəşlə şəhid olan fələstinli jurnalist Şirin Əbu Aklehi də gündəmə gətirdiyi bildirilib.
Digər tərəfdən, ABŞ prezidenti Bayden Səudiyyə Ərəbistanına səfərinin ikinci günündə, yəni Körfəz ölkələri, Misir, İordaniya və İraqdan nümayəndə heyətlərinin qatıldığı Körfəz Əməkdaşlıq Şurasının (KƏŞ) zirvəsində yeni açıqlamalar verib. ABŞ-ın Yaxın Şərqdə fəal tərəfdaş olmağa davam edəcəyini bildirən Bayden, bölgədə Rusiya, Çin və ya İranın doldura biləcəyi bir boşluğu tərk etməyəcəklərini təkrarlayıb.
Bayden Ciddədəki təmasları çərçivəsində İraqın baş naziri Mustafa Əl-Kazemi ilə görüşüb. İki lider İŞİD terror təşkilatının yenidən hakimiyyətə gəlməsinin qarşısını almaq üçün İraq və ABŞ arasında təhlükəsizlik koordinasiyasının davam etdirilməsi mövzusunda razılaşdıqlarını ifadə ediblər.
